ვინ მოიგებს ევროპის ჩემპიონატს? რა თქმა უნდა, საქართველო – ხვიჩა კვარაცხელია
NEWSTODAY.GE
1 min read
მოვა დრო და ხვიჩა კვარაცხელია ავტობიოგრაფიულ წიგნს დაწერს, ხოლო რასაც ახლა წაიკითხავთ, შეგიძლიათ, მომავალ წიგნის ერთ-ერთ თავად განიხილოთ. საქართველოს ნაკრების ვარსკვლავმა The Players’ Tribune-ის საშუალებით ისეთი წერილი გამოაქვეყნა, ქართველი გულშემატკივრებისთვის მისი წაკითხვა ერთი სიამოვნება უნდა იყოს.
The Players’ Tribune ცნობილი მედია-პლატფორმაა, რომელიც უკვე 10 წელია ფუნქციონირებს და პროფესიონალი სპორტსმენების ისტორიებსა და თუ მათთან უშუალო საუბრებს აქვეყნებს, რაც ქომაგებში დიდ ინტერესს იწვევს. ამ მედიაში კვარაცხელიას გამოჩენა, მითუმეტეს, ჩვენი ქვეყნისთვის ისტორიული ტურნირის წინ, ნამდვილად სასიამოვნოა. ხომ გინდათ თურქეთთან თამაშამდე კიდევ უფრო იმედიანი განწყობა შეგექნათ? მაშინ ეს წერილი თქვენთვისაა.
“ჩემთვის მსოფლიოში საუკეთესო ფეხბურთელი მამა იყო. ვინმე მესიზე ან რონალდოზე თუ ლაპარაკობდა, მე ვპასუხობდი ხოლმე, “არა, არა, არა, მამაჩემი უკეთესია”. რა თქმა უნდა, როდესაც წამოვიზარდე, მეც მივხვდი, რომ რონალდინიო… ხო, შეიძლება უკეთესიც იყოს. ოღონდ სულ ცოტათი”…
“2022 წელს უკრაინაში ომი იწყება. ომი დიდი სირცხვილია. ვფიქრობ, კაცთმკვლელობა საერთოდ არ უნდა არსებობდეს. მგონი მარტივია – მშვიდობა უნდა სუფევდეს. ასე რომ, როდესაც ომი დაიწყო ვიფიქრე “მე აქ ვერ გავჩერდები, ჩემი ქვეყნის, ჩვენი ისტორიის გამო კლუბს გამოვუცხადე, რომ უნდა წავიდე”…
“საბერძნეთთან პენალტები როცა დაიწყო, საშინლად ვნერვიულობდი, არ მინდოდა ვინმეს ვენახე. ბოლოს ნიკამ რომ გაიტანა, მიწაზე დავეცი და ვაიმე, გამოგვივიდა-მეთქი. ჩემმა ცოლმა თამაშის მერე მნახა და მკითხა მთვრალი ხომ არ ხარო, გასახდელში ლუდი დალიეო? მე ვუპასუხე, რომ უბრალოდ ბედნიერი ვიყავი”…
“თურქეთის წინააღმდეგ ვთამაშობთ და მერე ჩეხეთთან და პორტუგალიასთან. ძნელი იქნება? იქნება. მწარე იქნება? იქნება. ვთხოვ თუ არა კრიშტიანუ რონალდუს მაისურს? შეიძლება. ალბათ, ვთხოვ. კაი, ვთხოვ ნამდვილად. რატომაც არა? ჩემი კერპია და ვეტყვი კიდევაც, მაგრამ ეს იმას არ ნიშნავს, რომ მოგება არ შეგვიძლია”.
ეს წერილიდან მხოლოდ მცირე ამონარიდებია, სრულად მისი გაცნობა კი აქ შეგიძლიათ.
About The Author
