საქართველოს ნაკრები ევრო 2024-ზე პირველ ისტორიულ მატჩს დღეს თურქეთის წინააღმდეგ გამართავს
NEWSTODAY.GE
1 min read
საქართველოს საფეხბურთო ნაკრები ისტორიის ახალ ფურცელს დღეს გადაშლის – 20 საათზე ევროპის ჩემპიონატზე თავის პირველ მატჩს გამართავს. მისი მოწინააღმდეგე თურქეთის ნაკრები იქნება. პირდაპირ რეპორტაჟებს საქართველოს პირველი არხი, პირველი არხი სპორტი და საქართველოს რადიო შემოგთავაზებთ.
მატჩი გერმანიის ქალაქ დორტმუნდში, „სიგნალ იდუნა პარკზე“ გაიმართება. ორივე გუნდს აქვს დანაკლისი. საქართველოს ნაკრებს ვერ დაეხმარება ნახევარმცველი ოთარ კიტეიშვილი, რომელმაც ამხანაგურ მატჩში, მონტენეგროსთან, კუნთის ტრავმა მიიღო. მწვრთნელი ვილი სანიოლი იმედოვნებს, რომ ოთარი გუნდს მომდევნო მატჩისთვის, ჩეხეთთან სათამაშოდ დაუბრუნდება.
„ოთარ კიტეიშვილისა და საბა კვირკველიას მდგომარეობას რაც შეეხება, კვირკველია სათამაშოდ მზად არის, ხოლო კიტეიშვილი თურქებთან შეხვედრას გამოტოვებს.
შეკრების დროსაც ვგრძნობდი, რომ ემოციურმა ფონმა გადაიარა და ჩვენი მოთამაშეები ფიზიკურად, ემოციურად და ფსიქოლოგიურად ევროპის ჩემპიონატზე სათამაშოდ მზად არიან“, – აღნიშნა საქართველოს ნაკრების მწვრთნელმა ვილი სანიოლმა.
ჩვენი გუნდის შესახებ მოკლედ ისაუბრა თურქების იტალიელმა მწვრთნელმა ვინჩენცო მონტელამ:
„გერმანიაში ჩვენი მრავალრიცხოვანი ქომაგის წინაშე თამაში დიდი პატივია. საქართველო რთულად დასაძლევი მოწინააღმდეგეა. ამასთან, სადებიუტო მატჩში ძალიან მოტივირებული იქნება. იოლი მატჩი არ გველის, უნდა მშვიდად ვიყოთ და ორგანიზებულად ვითამაშოთ. აქ ოცნების ასახდენად ჩამოვედით. ამისთვის ყველაფერი უნდა გავიღოთ“.
About The Author
