ჩვენთვის სახელებს მნიშვნელობა არ აქვს, მოედანზე მოსაგებად გავალთ – ხვიჩა კვარაცხელია
NEWSTODAY.GE
1 min read
ხვალ, 26 ივნისს ევროპის ჩემპიონატის ჯგუფური ეტაპი საქართველო-პორტუგალიის მატჩით დასრულდება. ვილი სანიოლის გუნდი პლეი ოფში გასასვლელად პორტუგალიას დაუპირისპირდება.
ფრანგ სპეციალისტთან ერთად დღეს პრესკონფერენციაზე იმყოფებოდა ხვიჩა კვარაცხელიაც, რომელმაც ამ მნიშვნელოვან და ისტორიულ შეხვედრაზე, მეტოქეზე და კრიშტიანო რონალდოზე ილაპარაკა.
ხვიჩა კვარაცხელია (საქართველოს ნაკრების ფეხბურთელი):
…წინა ორ მატჩზე: “განვლილ მატჩებზე საუბარი კარგს არაფერს მოგვიტანს, ახლა პორტუგალიასთან მატჩზე ვართ კონცენტრირებული. შეიძლება წინა ორ შეხვედრაში უფრო მეტს ვიმსახურებდით. ბოლო წუთებზე გამოუყენებელი მომენტები დასანანია, არ გაგვიმართლა. თურქეთთან შეგვეძლო ფრე გვეთამაშა, ჩეხეთთან მოგვეგო და მეტი ქულა აგვეღო ამ ორ შეხვედრაში. დავრწმუნდით, რომ ყველასთან თამაში შეიძლება. ეს გამოცდილება გაგვაძლიერებს, ყოველ წუთს შეიძლება ისეთი რამ მოხდეს, რომ თამაშში გარდატეხა შევიტანოთ და მაქსიმალურად ვეცდებით, რომ მომენტები გამოვიყენოთ, ამაზე ვარჯიშებზეც ვმუშაობთ.”
…რონალდოსთან შეხვედრაზე: “კრიშტიანოსთან თამაშის წინ ღელვას არ ვგრძნობ, პირიქით, ვოცნებობდი, რომ მის წინააღმდეგ მეთამაშა. ახლა, როცა ის ასაკშია, ევროპაშიც აღარ თამაშობს, ისე დაემთხვა, რომ ჩვენს ჯგუფში მოხვდა. მოტივირებული ვარ და იმის თქმა შემიძლია, რომ ოცნებები ხდება. იმედი მაქვს, რომ თამაშიც ჩვენს სასარგებლოდ დასრულდება და კრიშტიანოს მაისურიც მე შემხვდება (იღიმის – რედ).”
…პორტუგალიასთან მატჩზე: “რა თქმა უნდა, რთული თამაში იქნება, მაგრამ ჩვენ უფრო მოტივირებულები ვართ, ვიდრე პორტუგალია, რადგან ჯგუფიდან ისინი უკვე გავიდნენ. ჩვენთვის კარგი გამოცდილებაა ასეთ ნაკრებთან მსგავს ტურნირზე თამაში. ალბათ, ბევრს არ სჯეროდა, რომ ევროპის ჩემპიონატზე ვიქნებოდით, მაგრამ ჩვენ აქ ვართ და ჯგუფიდან გასვლის შანსი გვაქვს. ჩემი აზრით, ყველაფერი შესაძლებელია, 1% შანსიც უნდა გამოიყენო და ამისთვის ყველაფერი გააკეთო. ჩვენც მაქსიმალურად ვემზადებით და უნდა ვეცადოთ, რომ ისტორიას კიდევ ერთი ფურცელი შევმატოთ, ყველაფერი უნდა გავაკეთოთ, რაც შეგვიძლია და მზად ვართ. იმედი მაქვს, ყველაფერი ჩვენს სასარგებლოდ დასრულდება.
პეპე ძალიან გამოცდილი ფეხბურთელია, დიდი კარიერა აქვს, მის წინააღმდეგ თამაში სასიამოვნოა და ეს თითოეული შემტევისთვის დიდი გამოცდილება იქნება. მზად ვართ და ვინც არ უნდა იყოს მოედანზე მცველი, ჩვენი მიზანია, გოლი გავიტანოთ და წინ ვიაროთ. პორტუგალიას ძალიან გამოცდილი მოთამაშეები ჰყავს. ვაფასებთ მეტოქეს და იმის თქმა შეგვიძლია, რომ ბევრ კარგ გუნდთან გვითამაშია, მოგვიგია კიდევაც, სხვა შედეგიც ყოფილა, მაგრამ იმის თქმა დარწმუნებით შემიძლია, რომ ჩვენთვის ფეხბურთელების გვარებს და სახელებს მნიშვნელობა არ აქვს, თითოეულ თამაშზე მოსაგებად გავდივართ, ჩეხეთთან და თურქეთთანაც. ვეცდებით, რომ ხვალაც მაქსიმუმი გავაკეთოთ, ვიცით, რა ამოცანა გვაქვს და ხვალ საქართველო მოედანზე მოსაგებად გავა, მნიშვნელობა არ აქვს, ვინ ითამაშებს პორტუგალიის ნაკრებში.”
…ლეაოზე: “ბევრჯერ მითქვამს, რომ რაფაელ ლეაოსთან კარგი ურთიერთობა მაქვს. ევროპის ჩემპიონატის წინ ერთმანეთს წარმატებები ვუსურვეთ. ძალიან კარგი ფეხბუთელი და ადამიანია, მის მიმართ დიდი პატივისცემა მაქვს. სამწუხარო და ცოტა სასიხარულოცაა, რომ არ ითამაშებს.”
…ევრო 2024-ზე ყოფნაზე: “შეიძლებოდა წინა ორ ტურში უფრო მეტის ქულის მოპოვება, დანარჩენში ვილის დავეთანხმები – ბევრი ამბობდა, რომ არ ვიმსახურებდით ევროპის ჩემპიონატზე ყოფნას, მაგრამ განვლილ ორ მატჩში ყველას ვაჩვენეთ, რომ ყველა გუნდთან შეგვიძლია თამაში და ცოტა დაგვაკლდა ორივე მატჩის მოსაგებად. ჯერ კიდევ გვაქვს შანსი, ყველას დავუმტკიცოთ, რომ აქ ტურისტებად არ ჩამოვსულვართ და ჯფგუფიდან გასვლაც შეგვიძლია.”
About The Author
