NEWSTODAY.GE 
საქართველოს საპატრიარქო პარიზის ოლიმპიადის გახსნის შესახებ განცხადებას ავრცელებს და “საერთო აღშფოთებას და გულისტკივილს” უერთდება.
“დიდად ვწუხვართ საფრანგეთში ოლიმპიადის გახსნის დროს დადგმული გარკვეული სცენების გამო და ვეთანხმებით მსოფლიო საპატრიარქოს განცხადებას, სადაც, სხვა მნიშვნელოვან აქცენტებთან ერთად, აღნიშნულია შემდეგი: “ძალიან სამწუხაროა, რომ… პარიზში, ჩვენ მოწმენი გავხდით ქრისტიანობისა და წმინდა სახარების შეურაცხმყოფელი წარმოდგენებისა, რაც, ასევე, შეურაცხყოფდა ყველა ცივილიზებულ ადამიანს, რომელიც აღიარებს რწმენის უფლებას და პატივს სცემს რელიგიურ სიმბოლოებს“.
ჩვენც, ჩვენის მხრივ, ვუერთდებით საერთო აღშფოთებასა და გულისტკივილს, გამოწვეულს მკრეხელური დადგმებით, რამაც საზეიმო გახსნა ზოგადადამიანური ღირსების შეურაცხყოფად და ლგბტ+ იდეოლოგიის პროპაგანდად აქცია”, – წერია საპატრიარქოს განცხადებაში.
პარიზის 2024 წლის ოლიმპიური თამაშების ორგანიზატორებმა 28 ივლისს განაცხადეს, რომ კათოლიკე და სხვა ქრისტიანული ჯგუფების მიმართ ბოდიშს იხდიან მას შემდეგ, რაც თამაშების გახსნის ცერემონიაზე ლეონარდო და ვინჩის საიდუმლო სერობასთან მიმსგავსებულ ეპიზოდს აზრთა სხვადასხვაობა მოჰყვა.
“ცხადია, არ ყოფილა განზრახვა, რომ რომელიმე რელიგიური ჯგუფის მიმართ უპატივცემულობა გამოგვეხატა. [გახსნის ცერემონიის] მიზანი საზოგადოების ტოლერანტულობის აღნიშვნა იყო”. – განაცხადა პარიზის ოლიმპიადის წარმომადგენელმა ენ დეკამპმა პრესკონფერენციაზე.
მისი თქმით, “ეს ამბიცია მიღწეულია. თუკი ვინმე შეურაცხყოფილი დარჩა, ბოდიშს ვიხდით”.
ამასთანავე, გახსნის ცერემონიის სამხატვრო ხელმძღვანელის, თომას ჟოლის თქმით, აღნიშნული ეპიზოდის შთაგონება “საიდუმლო სერობა” არ ყოფილა და იგი წარმართულ ნადიმს ასახავდა, რომელიც ოლიმპოს მთის ღმერთებთან არის კავშირში.
“ვერასდროს იპოვით ჩემს ნამუშევრებში ვინმეს ან რაიმეს დამცირების სურვილს”. – განაცხადა ჟოლიმ BFMTV-სთან საუბრისას.
მანამდე, 27 ივლისს საფრანგეთის კათოლიკურმა ეკლესიამ ოლიმპიადის გახსნის ცერემონიის აღნიშნული ეპიზოდი გააკრიტიკა და განაცხადა, რომ “ეს ცერემონია, სამწუხაროდ, ქრისტიანობის დაცინვისა და გამასხარავების სცენებს მოიცავდა, რასაც ჩვენ ღრმად ვძრახავთ”.
About The Author
