უკრაინამ აშშ-სთან მინერალების შეთანხმებას შესაძლოა დღესვე მოაწეროს ხელი – Bloomberg
NEWSTODAY.GE
1 min read
Bloomberg-ის ექსკლუზიური ინფორმაციით, უკრაინამ აშშ-სთან იშვიათი მინერალების შეთანხმებას შესაძლოა დღეს, 30 აპრილს მოაწეროს ხელი.
გამოცემა წყაროზე დაყრდნობით წერს, რომ უკრაინის ეკონომიკის მინისტრი, იულია სვირიდენკო შეთანხმებაზე ხელმოსაწერად ვაშინგტონში მიემგზავრება.
შეთანხმების ფარგლებში, აშშ და უკრაინა ერთობლივად გაზრდიან ინვესტირებას წიაღისეულის მოპოვებაში, ენერგეტიკასა და შესაბამის ტექნოლოგიებში. ვაშინგტონი ასევე იზიარებს უკრაინის მოთხოვნებს, რომ შეთანხმებამ სამომავლოდ ხელი არ შეუშალოს უკრაინის ევროკავშირში გაწევრიანებას.
ამასთან ერთად, შეთანხმების ფარგლებში აშშ-ს კონტრიბუციად ჩაითვლება მხოლოდ ის სამხედრო დახმარება, რასაც აშშ უკრაინას შეთანხმების გაფორმების შემდეგ გადასცემს. ამის შესახებ უკრაინის პრემიერმინისტრმა, დენის შმიგალმაც ისაუბრა და თქვა, რომ აშშ დათანხმდა, შეთანხმების შედეგად შექმნილ ფონდში კონტრიბუციად არ ჩაითვალოს აშშ-ს მიერ ომის დაწყებიდან უკრაინისთვის გამოყოფილი მილიარდობით დოლარის ოდენობის დახმარება.
შმიგალი Telegram-ზე გავრცელებულ განცხადებაში აღნიშნავს, რომ მნიშვნელოვანი შეხვედრა ჰქონდა აშშ-ს ფინანსთა მინისტრთან, სკოტ ბესენტთან, სადაც მხარეებმა ორ ქვეყანას შორის მინერალებზე შეთანხმება განიხილეს და ამ მხრივ “კარგი პროგრესი” იყო.
მისი თქმით, მთავარი საკითხი წითელი ხაზების განსაზღვრაა და შეთანხმება თანხვედრაში უნდა იყოს ევროკავშირის ვალდებულებებთან და ასევე არ უნდა ეწინააღმდეგებოდეს უკრაინის კონსტიტუციას.
ამასთანავე, შმიგალის თქმით, აშშ-მ და უკრაინამ მიაღწიეს შეთანხმებას, რომ დოკუმენტში არ შევა უკრაინისთვის გაწეული იმ დახმარების ანაზღაურების საკითხი, რომელიც აშშ-მ ქვეყანას შეთანხმების დადებამდე მიაწოდა.
26 აპრილს, აშშ-ს პრეზიდენტის, დონალდ ტრამპის თქმით, იმედოვნებს, რომ უკრაინა იშვიათ წიაღისეულზე შეთანხმებას “დაუყოვნებლივ მოაწერს ხელს” და რომ ეს “სულ მცირე, სამი კვირით არის დაგვიანებული”.
ტრამპმა ასევე დაწერა, რომ რუსეთსა და უკრაინას შორის სამშვიდობო შეთანხმებაზე მუშაობა “სირთულეების გარეშე” მიმდინარეობს. მისივე თქმით, ამ მხრივ მომავალში წარმატებას ელის.
ამის შესახებ ტრამპი თავის სოციალურ ქსელზე, Truth Social-ზე წერს.
“უკრაინამ, რომელსაც ვოლოდიმირ ზელენსკი ხელმძღვანელობს, აშშ-სთან ძალიან მნიშვნელოვან იშვიათი წიაღისეულის შეთანხმების საბოლოო დოკუმენტებისთვის ხელი არ მოუწერია. სულ მცირე, სამი კვირით არის დაგვიანებული. იმედია, დაუყოვნებლივ მოაწერენ ხელს. რუსეთსა და უკრაინას შორის ზოგად სამშვიდობო შეთანხმებაზე მუშაობა სირთულეების გარეშე მიმდინარეობს. როგორც ჩანს, მომავალში წარმატება გველის!”. – წერს ტრამპი.
მანამდე, უკრაინის ფინანსთა მინიტრმა, სერჰიი მარჩენკომ Reuters-თან საუბრისას თქვა, რომ უკრაინასა და აშშ-ს კრიტიკული მინერალების შესახებ შეთანხმებისთვის ხელის მოწერამდე გარკვეული საკითხები აქვთ გასარკვევი, თუმცა უკრაინული მხარე მის გასაფორმებლად “რაც შეიძლება სწრაფად” მუშაობს.
გამოცემის თანახმად, მარჩენკოს უკრაინული მხარის კითხვების შესახებ დეტალებზე არ ულაპარაკია და ხელშეკრულების გაფორმების ზუსტი სავარაუდო დრო არ დაუსახელებია.
“პროგრესი იყო და ახლა ჩვენი გუნდები ძალიან მჭიდროდ მუშაობენ. […] კვლავ არის რაღაც კითხვები, რომლებსაც განვიხილავთ. […] რაც შეიძლება სწრაფად ვმუშაობთ, რომ შეთანხმებას ხელი მოვაწეროთ”. – თქვა მარჩენკომ გამოცემასთან საუბრისას.
მანამდე, 17 აპრილს აშშ-ს პრეზიდენტმა, დონალდ ტრამპმა თქვა, რომ მინერალების შესახებ შეთანხმებას უკრაინული და ამერიკული მხარეები ხელს 24 აპრილს მოაწერდნენ. თუმცა, მარჩენკომ Reuters-თან საუბრისას აღნიშნა, რომ ამას არ ელოდებოდა.
გუშინ, 24 აპრილს მარჩენკო და სხვა უკრაინელი მაღალჩინოსნები აშშ-ს ფინანსთა მინისტრ, სკოტ ბესენტს შეხვდნენ, რათა იშვიათ წიაღისეულზე შეთანხმება და დასავლეთში რუსეთ-უკრაინის ომის დაწყების შემდეგ გაყინული რუსული აქტივების შესახებ შეკითხვები განეხილათ.
მემორანდუმს ხელს უკრაინის პრემიერმინისტრის პირველი მოადგილე და ეკონომიკის მინისტრი იულია სვირიდენკო და აშშ-ს ფინანსთა მინისტრი სკოტ ბესენტი აწერენ.
მემორანდუმს ხელს უკრაინის პრემიერმინისტრის პირველი მოადგილე და ეკონომიკის მინისტრი იულია სვირიდენკო და აშშ-ს ფინანსთა მინისტრი სკოტ ბესენტი აწერენ.
About The Author
