“სერიოზული კითხვები გაქვთ? სისულელეა” – კალაძე “რადიო თავისუფლების” მიერ გავრცელებულ ინფორმაციაზე
NEWSTODAY.GE
1 min read
სერიოზული კითხვები გაქვთ? – ასე პასუხობს თბილისის მერი ჟურნალისტებს “რადიო თავისუფლების” მიერ გავრცელებულ ინფორმაციაზე, რომ აშშ ფლობს ინფორმაციას, რომელსაც ქართული პოლიტიკური ელიტის რეპუტაციის გაცამტვერება შეუძლია. კალაძისთვის ეს ინფორმაცია არასერიოზული და სისულელეა:
“სისულელეა და სისულელეს ნამდვილად ვაპირებ ვუპასუხო” – ამბობს კალაძე.
“რადიო თავისუფლების” ვაშინგტონის ბიუროს ჟურნალისტს MEGOBARI Act-ზე მომუშავე გუნდის წევრი ანონიმურობის პირობით ეუბნება, რომ კანონპროექტზე მუშაობა უკვე რამდენიმე თვეა მიმდინარეობს, რამდენადაც კონგრესში ექსპერტები მოელოდნენ, რომ “ქართული ოცნება” ერთი წლის წინ, პროტესტის ფონზე გაწვეული კანონპროექტის ხელახლა მიღებას შეეცდებოდა.
მედიას კანონპროეტში ჩახედული წყარო ეუბნება, რომ გადაწყვეტილება – მათ შორის სანქციებსა და რუსეთისა და ჩინეთის მავნე გავლენის საკითხებზე, შესაძლოა მალე გამოცხადდეს MEGOBARI Act-ის მიღების შემთხვევაში.
“ქართულ პოლიტიკურ ელიტაში, რუსი აგენტების გამოაშკარავება ისევე როგორც ჩინეთის გავლენის შემთხვევების გამოვლენა, საფუძველს გამოაცლის „ქართული ოცნების“ ნარატივს, რომლის თანახმად, ის ქვეყნის სუვერენიტეტს იცავს „უცხოური აგენტების“ კანონპროექტით”.
წყარო რადიო თავისუფლების კორესპონდენტს ვაშინგტონში, ეუბნება, რომ შეერთებული შტატები ფლობს ინფორმაციას, რომელსაც “ქართული პოლიტიკური ელიტის წარმომადგენელების რეპუტაციის გაცამტვერება შეუძლია” – წერია სტატიაში.
20 მაისს გამოცემა “პოლიტიკომ” გაავრცელა ინფორმაცია, რომ სამხრეთ კაროლინის რესპუბლიკელმა კონგრესმენმა, ჯო უილსონმა კონგრესში ამ კვირაში წარადგინა კანონპროექტი, რომლის მიხედვითაც, ამერიკამ საქართველოს შესაძლოა გამოუყოს დახმარების პაკეტი ეკონომიკისა და უსაფრთხოების სფეროში, თუკი საქართველოს მთავრობა შეწყვეტს მზარდად ანტიდასავლურ რიტორიკას და უკუსვლას ადამიანის უფლებების კუთხით. გარდა ამისა, “პოლიტიკოს” ცნობით, კანონპროექტი საქართველოს მოქალაქეებისთვის სავიზო რეჟიმის ლიბერალიზაციასაც მოითხოვს.
გამოცემა წერს, რომ პროგრამა გააქტიურდება იმ შემთხვევაში, თუ აშშ დაადასტურებს, რომ “საქართველომ აჩვენა მნიშვნელოვანი და მდგრადი პროგრესი დემოკრატიის აღმავლობის მიმართულებით, რაც დასტურდება, მინიმუმ, არსებითად სამართლიანი და თავისუფალი არჩევნებით და დაბალანსებული წინასაარჩევნო გარემოთი”.
გარდა ამისა, POLITICO-ს ინფორმაციით, კანონპროექტი საქართველოს ხელისუფლების იმ წარმომადგენლებისთვის აქტივების გაყინვასა და სავიზო აკრძალვებს ითვალისწინებს, რომლებმაც მხარი დაუჭირეს რუსულ კანონს.
About The Author
