NEWSTODAY.GE 
მაისში, ანუ ბოლო 3 კვირაში საქართველოში 4 ქალი მოკლეს. ბოლო შემთხვევა გუშინ მოხდა. სამეგრელოში, სოფელ კორცხელში ქმარმა ცოლი ბლაგვი საგნით მოკლა. 3 დღის წინ კი 27 წლის კაცმა რუსთავში, ერთ-ერთ სკვერში ყოფილი მეუღლე და ყოფილი სიდედრი ჩაცხრილა. 16 მაისს, გარდაბანში 23 წლის ძმამ და მოკლა.
ფემიციდი ქვეყნისთვის უდიდესი და სისტემური პრობლემაა. ამ ვითარებაში კი სახელმწიფო უმოქმედოა. შინაგან საქმეთა სამინისტრო მხოლოდ პოლიტიკური ოპონენტების დევნითა და მშვიდობიან მომიტინგეებზე ძალადობით არის დაკავებული. სახალხო დამცველმა ოცნების მთავრობას მიმართა რომ სისტემური, თანამიმდევრული ზომები გაატაროს და ჰქონდეს მკაცრი პოლიტიკა ოჯახში ძალადობის ჩამდენ პირთა მიმართ.
22 მაისი რუსთავი, დუმბაძის ქუჩა, 12 საათი და 30 წუთი – ქალაქის ცენტრალურ ქუჩაზე სანადირო თოფიდან გასროლილმა 5-მა ტყვიამ 2 ქალის სიცოცხლე შეიწირა. 27 წლის გიორგი ფირაშვილმა რეგისტრირებული სანადირო თოფით მეუღლესა და სიდედრს ესროლა. თვითმხილველები ამბობენ, რომ მეხუთე ტყვია, რომელიც ცოლს მოხვდა, საკონტროლო იყო. გულ-მკერდის არეში მიყენებული მძიმე დაზიანებებით დედა-შვილი ადგილზე დაიღუპა.
სიძის მიერ მოკლული ქალი 48 წლის ინგა ბეგაშვილია. მას რუსთავში ყველა კარგად იცნობდა, როგორც მშრომელ და სანდო ადამიანს. მარტოხელა დედამ 5 შვილი მძიმე შრომისა და ტანჯვის ფასად გაზარდა. ქალი წლების განმავლობაში ძველ ბაზარში მუშაობდა. ჯანმრთელობის პრობლემების მიუხედავად, თანხმდებოდა ყველაზე მძიმე სამუშაო გრაფიკსა და მცირე ანაზღაურებასაც კი, რომ თან ნაქირავები ბინის თანხა გადაეხადა და თან მცირეწლოვანი ბავშვები გამოეკვება.
ბოლო თვეებში რაც უფროსი შვილები წამოიზარდნენ და დედას ეხმარებოდნენ, სამსახურს თავი დაანება და შვილიშვილს ზრდიდა. ახალგაზრდა ქალს 4 შვილი დარჩა, მათ შორის ორი არასრულწლოვანია.
ამბის დეტალები, პირველ სასამართლო სხდომაზე გამჟღავნდა. პროკურორის ცნობით, 27 წლის კაცი 21 წლის მეუღლეზე ქორწინების დღიდან ფიზიკურად და ფსიქოლოგიურად სისტემატურად ძალადობდა, რადგან ცოლს პირად საკუთრებად აღიქვამდა.
ოჯახის წევრები ყვებიან, რომ ბრალდებულს ცოლის მკვლელობის მცდელობა მანამდეც ჰქონდა, მაგალითისთვის, იხსენებენ 20 მარტის შემთხვევას როცა გიორგი ფირაშვილი ცოლის დახრჩობას ცდილობდა. პროკურორის ცნობით, ფიზიკური ძალადობის გამო, 21 წლის ქალს ექიმის დახმარებაც დასჭირდა. მარიამ სოფრომაძემ სავარაუდოდ, შიშის გამო კლინიკაში დამალა, რომ მძიმე დაზიანებები საკუთარმა მეუღლემ მიაყენა. „მთავარმა არხმა“ მოიპოვა აუდიომასალა თუ რას ყვებიან მოკლული დედა-შვილის ოჯახის წევრები მომხდარზე.
ოჯახის ახლობლებისა და მეზობლების ინფორმაციით, გიორგი ფირაშვილის მშობლები დიდი ხნის წინ დაშორდნენ. 27 წლის კაცს დედასთან ურთიერთობა საერთოდ არ ჰქონდა, რადგან ამას მამა უკრძალავდა. ერთ-ერთი ვერსიით, ბრალდებულის დედა მარიამთან და ბავშვთან კომუნიკაციას ცდილობდა, რის გამოც ცოლ-ქმარს შორის მწვავე კონფლიქტიც მოხდა.
სასამართლო სხდომაზე ცნობილი გახდა, რომ დანაშაულის შესახებ იცოდა როგორც მარიამის ოჯახმა, ასევე გიორგი ფირაშვილის დედამაც, მაგრამ სამართალდამცავი უწყებისთვის არავის მიუმართავს. განგრძობითი და სისტემატური ძალადობის შემდეგ მარიამ სოფრომაძე ოჯახის მოთხოვნით ქმარს დაშორდა და ბავშვთან ერთად დედის ოჯახში დაბრუნდა. გიორგი ფირაშვილი დაშორებას მიუღებლად მიიჩნევდა და ამის გამო სიდედრისა და ცოლის უფროსი დედმამიშვილების მიმართ ხშირად აგრესიასაც გამოხატავდა.
ბრალდების მხარე დარწმუნებულია, რომ ფირაშვილმა მეუღლისა და მეუღლის დედის მკვლელობა წინასწარ დაგეგმა და ჩანაფიქრის სისრულეში მოსაყვანად ხელსაყრელ დროს ელოდებოდა. შესაბამისად პროკურორი დარწმუნებულია, რომ ბრალდებულს ეს დანაშაული აფექტის მდგომარეობაში არ ჩაუდენია.
ფაქტს, რომ გიორგი ფირაშვილი მკვლელობის დღეს მშვიდი და გაწონასწორებული იყო, ადასტურებენ რუსთავის პირველ დიაგნოსტიკურ ცენტრშიც. პედიატრმა ნინი კიკილაშვილმა ცოლ-ქმარი 6 თვის ბავშვთან ერთად დანაშაულის ჩადენამდე დაახლოებით 1 საათით ადრე ნახა და მომავალი ვიზიტიც შეათანხმა. ექიმი ამბობს, რომ ამ დღეს რაიმე საეჭვო არც ბავშვის მამისა და არც დედისთვის არ შეუნიშნავს.
ბრალდებული გიორგი ფირაშვილი სასამართლო სხდომას თავადაც დაესწრო, დარბაზში მოკლული ქალების ოჯახის წვერებიც იმყოფებოდნენ. ფირაშვილი ამ დრომდე დუმილის უფლებას იყენებს. მას ბრალი სისხლის სამართლის კოდექსის ყველაზე მძიმე მუხლით აქვს წარდგენილი და 16-დან 20 წლამდე ან უვადოდ თავისუფლების აღკვეთა ემუქრება. ფირაშვილის კერძო ადვოკატი ამ დრომდე ცალსახად ვერ ამბობს აღიარებს თუ არა ბრალს მისი დაცვის ქვეშ მყოფი. დანაშაულის ჩადენის მოტივთან დაკავშირებით კი ამბობს, რომ არსებობდა წინაპირობები, თუმცა კონკრეტულად რა რას გულისხმობს, ვერ აკონკრეტებს.
….
რუსთავში მომხდარი მკვლელობიდან 2 დღეში კიდევ ერთი საზარელი მკვლელობის შესახებ გახდა ცნობილი. ზუგდიდის სოფელ კორცხელში ქმარმა ცოლი მოკლა. 61 წლის კაცმა ცოლი საკუთარ მიწის ნაკვეთზე შეიტყუა და მას ჩაქუჩითა და ხელკეტით გაუსწორდა. ექიმებმა 51 წლის ფატიმა კუდავას გადარჩენა ვერ შეძლეს.
ცოლის მოკვლის შემდეგ გოჩა შოხაძემ შვილებს დაურეკა და დანაშაულზე მოუყვა, თავად კი მკვლელობის ადგილიდან მიიმალა. ის პოლიციამ 10-საათიანი ძებნის შემდეგ დააკავა. მეზობლების ცნობით, ცოლ-ქმარს შორის კონფლიქტს სისტემატური ხასიათი ჰქონდა, მაგრამ ქალს სამართალდამცველებისთვის არასდროს მიუმართავს.
…
ამ მკვლელობებამდე რამდენიმე დღით ადრე კი ცნობილი გახდა, რომ გარდაბანში 29 წლის ქალი საკუთარმა ძმამ განსაკუთრებული სისასტიკით მოკლა. 23 წლის კაცი ჯერ საკუთარი მანქანით განზრახ დაეჯახა დას, შემდეგ კი დანით სხეულზე მრავალჯერადი ჭრილობები მიაყენა და ადგილიდან მიიმალა. ახალგაზრდა ქალი ადგილზე გარდაიცვალა. დანაშაულის მიზეზი კი ის გახდა, რომ 21 წლის კაცი დის მეუღლესთან დაშორებას ოჯახის ღირსების შელახვად მიიჩნევდა.
2024 წლის პირველ ხუთ თვეში ფემიციდის მსხვერპლი 7 ქალი გახდა.
მძიმე სტატისტიკის მიუხედავად აუცილებელია რომ ყველას ახსოვდეს, ძალადობის ნებისმიერი ფორმით გამოვლენის შემთხვევაში მათ 112-ზე უნდა დარეკონ და დახმარება ითხოვონ.
About The Author
