შსს-მ სპეცრაზმის ლანჩისთვის გამოცხადებული, 200 000-ლარიანი ტენდერი შეწყვიტა

შინაგან საქმეთა სამინისტრომ სპეცრაზმის ლანჩისთვის გამოცხადებული, 200 000-ლარიანი ტენდერი შეწყვიტა – ინფორმაციას გამოცემა “ბათუმელები” ავრცელებს და წერს, რომ ტენდერი შეწყდა იმ დროს, როცა ის შერჩევა-შეფასების ეტაპზე იყო, ანუ შესყიდვების პორტალზე უკვე ჩანდა მიმწოდებელი, რომელიც მომსახურებას ყველაზე დაბალ ფასად სთავაზობდა.

მანამდე კი, როგორც გამოცემა წერს, აპრილ-მაისში, რუსული კანონის წინააღმდეგ გამართულ საპროტესტო აქციებზე, სპეცრაზმის ლანჩისთვის სამინისტრომ 665 244 ლარი დახარჯა. აქედან ნახევარ მილიონზე მეტი, 515 244 ლარი გამარტივებული წესით. რადგან ტენდერი შეწყდა და ამ დროის, 29 მაისის მონაცემებით ჯერ ახალი არ გამოცხადებულა, შსს-ს ლანჩის შესყიდვა ისევ ტენდერის გარეშე – გამარტივებული წესით მოუწევს.

ცნობისთვის, შსს-მ ტენდერი 2024 წლის 8 მაისს გამოაცხადა, წინადადებების მიღება 20 მაისს დასრულდა, 23 მაისს კი, სამინისტრომ ტენდერი შეწყვიტა. ამასთანავე, შსს-ს გამარტივებულ შესყიდვებზე გაფორმებული ხელშეკრულებები შესყიდვების პორტალზე განთავსებული არ არის, შესაბამისად, უცნობია, ვისთან აფორმებს სამინისტრო ხელშეკრულებებს.

About The Author

NEWSTODAY.GE

See author's posts