ანტიკორუფციულმა ბიურომ “ფლანგვის დეტექტორს”თანამდებობის პირების მონიტორინგის შედეგები არ გაუგზავნა

“ფლანგვის დეტექტორმა” ანტიკორუფციულ ბიუროს ორჯერ , 25 და 29 აპრილს, მიმართა წერილით. მან მოითხოვა თანამდებობის პირების სიისა და მათი მონიტორინგის შედეგების გასაჯაროება. ბიურომ “ფლანგვის დეტექტორს” ინფორმაცია არ გაუგზავნა და განუცხადა, რომ ეს ინფორმაცია მათ საიტზე უკვე გამოქვეყნებულია.

“ფლანგვის დეტექტორი” წერს, რომ ” ბიუროს პასუხი არ შეესაბამება სიმართლეს, რადგან „ანტიკორუფციული ბიუროს 2023 წლის საქმიანობის ანგარიშში“ განხილულია შემოწმებული თანამდებობის პირებისა და მათი მონიტორინგისას გამოვლენილი შეუსაბამობების საერთო რიცხვი. მაგალითად, ანგარიშის თანახმად, 2023 წელს ჯამში პარლამენტის 78 წევრი შემოწმდა, თუმცა დეპუტატების კონკრეტული ვინაობა და მათი მონიტორინგის შედეგები უცნობია.”

მათივე თქმით, „გამჭვირვალობის“ საბაბით ე.წ. რუსული კანონის მხარდამჭერი დეპუტატები შემჩნეულნი არიან ქონებრივი დეკლარაციების არაკეთილსინდისიერად შევსებაში. 2023 წლიდან კი აღნიშნული ინფორმაციის გასაჯაროება ანტიკორუფციული ბიუროს კომპეტენციაში შედის. 2023 წელს გამოქვეყნებულ ანგარიშში ბიურომ მხოლოდ ზოგადი ინფორმაცია შეიტანა და შემოწმებული პირების სია არ გამოუქვეყნებია.

„ფლანგვის დეტექტორი“ მოუწოდებს ანტიკორუფციულ ბიუროს, რომ სიის ფორმით გაასაჯაროოს 2023 წელს შემოწმებული თანამდებობის პირთა მონიტორინგის შედეგები და ის შეუსაბამობები, რომელიც მათ მიერ შევსებულ ქონებრივ დეკლარაციებში გამოვლინდა. 

ევროპის კავშირის 12-პუნქტიანი გეგმის მე-4 პრიორიტეტი მოიცავს ანტიკორუფციული მექანიზმების გაძლიერებას. ამ პრიორიტეტის შესრულების მიზნით, 2022 წლის 30 ნოემბერს ანტიკორუფციული ბიურო “კორუფციის წინააღმდეგ ბრძოლის შესახებ“ საქართველოს კანონში განხორციელებული ცვლილებების საფუძველზე შეიქმნა. ანტიკორუფციული ბიუროს ამოცანაა, თავისი უფლებამოსილების ფარგლებში, ხელი შეუწყოს კორუფციის წინააღმდეგ ბრძოლას. ბიურო, ასევე, უზრუნველყოფს თანამდებობის პირთა ქონებრივი მდგომარეობის დეკლარირებას, მონიტორინგსა და საჯაროობას.

About The Author

NEWSTODAY.GE

See author's posts