NEWSTODAY.GE 
საქართველოს ნაკრები ევროპის ჩემპიონატს თურქეთთან შეხვედრით იწყებს. ხვალ, 18 ივნისს, “ვესტაფელშტადიონზე” ვილი სანიოლის გუნდი ისტორიულ მატჩს გამართავს.
ევრო 2024-ზე ისტორიულ დებიუტამდე საქართველოს ნაკრების მთავარ მწვრთნელთან ერთად, ოფიციალურ პრესკონფერენციაზე ეროვნული გუნდის კაპიტანმა გურამ კაშიამაც ისაუბრა.
“ჩვენი ქვეყანა ჩვენით ამაყობს, ეს დღეები ჩვენს ცხოვრებაში ერთ-ერთი ყველაზე ბედნიერია. გუნდში შესანიშნავი განწყობაა. ქვეყანა ფეხბურთის ენერგიით ცხოვრობს,” – განაცხადა კაშიამ და დაამატა: “საქართველოდან ერთი ადამიანი სკუტერით ჩამოვიდა, რომელმაც 4 000 კილომეტრი გამოიარა და ქართველი გულშემატკივრების სურვილები ჩამოგვიტანა. ამ ემოციების გამო და ამ ხალხის გამო ბრძოლა ყოველთვის ღირს. ვიცი, ბევრმა დაზოგა ფული, რომ აქ წამოსულიყო. ვიცით, რომ წარმოვადგენთ ჩვენს ქვეყანას და ვეცდებით, ჩვენი თავი სათანადოდ წარმოვაჩინოთ. ეს კარგად გამოგვდის და კიდევ ერთხელ ვეცდებით ამას.
არ ვიცი, ნახეთ თუ არა ვიდეო, მე ლამის გონება დავკარგე, ეს იყო ერთ-ერთი საუკეთესო მომენტი, რაც კარიერაში მქონია და ძალიან გამორჩეულია, როცა ქვეყანა ამაყობს შენი მიღწევებით. ეს საუკეთესო მომენტი იყო ჩემს ცხოვრებაში. როდესაც შეკრება დავიწყეთ, ვთქვით, რომ ეს შეგრძნებები და ემოციები გვერდით უნდა გადავდოთ და დავიწყოთ მუშაობა. აქ ვართ, გვინდა ვიბრძოლოთ და როგორც არასდროს, ისე ვიბრძოლებთ. ზეიმის დრო აღარ არის, ბრძოლის დროა და გვინდა ვაჩვენოთ ყველას, რომ აქ ყოფნას ვიმსახურებთ.”
თურქეთთან შეხვედრის შემდეგ, 22 ივნისს საქართველოს ნაკრები ჰამბურგში ჩეხეთს დაუპირისპირდება, 26 ივნისს კი, გელზერკინხენში პორტუგალიას შეხვდება.
About The Author
