
საქართველოს ეროვნულმა ნაკრებმა მისთვის სადებიუტო ევროპის ჩემპიონატზე გამოსვლა თურქეთთან მატჩით დაიწყო და მიუხედავად იმისა, რომ ბრძოლაში დამარცხდა (1:3), შეიძლება თქმა, რომ ტურნირს ხიბლი შემატა. დორტმუნდის “ვესტფალენშტადიონზე” გამართულ დაპირისპირებაში ვილი სანიოლის გუნდმა, დებიუტანტის კვალობაზე, საკმაოდ შთამბეჭდავად ითამაშა, ჰქონდა მომენტებიც და ცოტაც რომ გამართლებოდა (ორჯერ თურქეთის კარი გაშვებულ გოლს ძელმა გადაარჩინა), სულ ცოტა, ქულას მოიპოვებდა.
თურქებმა ანგარიში 25-ე წუთზე მიულდიურის გოლით გახსნეს, რასაც 32-ე წუთზე გიორგი მიქაუტაძემ უპასუხა. მონტელას გუნდი ანგარიშში მეორედ 65-ე წუთზე გიულერის გოლით დაწინაურდა, საბოლოო ანგარიში კი კომპენსირებულ დროში აკტურკოღლუმ დააფიქსირა, რომელმაც ისარგებლა იმით, რომ საქართველოს ნაკრები მთელი შემადგენლობით, მათ შორის მეკარე გიორგი მამარდაშვილთან ერთად, შეტევაში იყო წასული.
შეხვედრის დასრულების შემდეგ საქართველოს ნაკრების მთავარმა მწვრთნელმა პრესკონფერენციაზე ისაუბრა.