“ჩვენ მათ უდიდეს პატივს ვცემთ. ეს არის გუნდი, რომელიც შესანიშნავ ტურნირს ატარებს” – ესპანეთის ნაკრების მწვრთნელი
NEWSTODAY.GE
1 min read
ზღაპარი გრძელდება! საქართველოს ნაკრები ევროპის ჩემპიონატის პლეი ოფშია, სადაც ტურნირის კიდევ ერთ-ერთ მთავარ ფავორიტს, ესპანეთის ნაკრებს დაუპირისპირდება. ვილი სანიოლის გუნდმა პორტუგალიასთან გამარჯვების შემდეგ დაამტკიცა, რომ ყველასთან თამაში შეგვიძლია და წინ ისტორიული მერვედფინალი გველოდება.
ცოტა ხნის წინ საქართველოს ნაკრების და მომავალი შეხვედრის შესახებ ისაუბრა ესპანეთის ნაკრების მთავარმა მწვრთნელმა, ლუის დე ლა ფუენტემ.
“ჩვენ მათ უდიდეს პატივს ვცემთ. ეს არის გუნდი, რომელიც შესანიშნავ ტურნირს ატარებს და რომელმაც პორტუგალია დაამარცხა. ჩვენი გამოცდილებიდან გამომდინარე, ვხედავთ, რომ ისინი უმჯობესდებიან და პროგრესირებენ. შემდეგ ეტაპზე გასვლის შანსი რომ გვქონდეს, თავი საუკეთესოდ უნდა წარმოვაჩინოთ.
ჩვენ ვხედავთ, რომ მათ, გარკვეულწილად, სისტემა შეცვალეს, მაგრამ არა იდეა, რომელიც აქვთ, იმ მოთამაშეებით, რომლებიც კონტრშეტევაზე სწრაფად გადადიან. ფრთხილად უნდა ვიყოთ. გასული მატჩების გამოცდილება, პლეი ოფში გასვლა და დამატებითი მოტივაცია, რომელიც პორტუგალიის დამარცხებით მიიღეს, მათ უფრო საშიშებს ხდის. უნდა დავამტკიცოთ ჩვენი იდეა, გზა და გავაგრძელოთ ზრდა. ჩვენს თავებში, გულებში და ფეხებში უნდა განვვითარდეთ. ფეხბურთელებს ეს ესმით. თუ შორს გასვლა გვსურს, გაუმჯობესება მუდმივი უნდა იყოს”, – აღნიშნა დე ლა ფუენტემ.
საქართველოს ნაკრები ესპანეთს კვირას, 30 ივნისს, კიოლნში დაუპირისპირდება. შეხვედრა თბილისის დროით 23:00 საათზე დაიწყება.
About The Author
