NEWSTODAY.GE 
ქვემო ქართლი რამდენიმე კვირაა, ვიცე -გუბერნატორის გარეშეა დარჩენილი. გიორგი შინჯიკაშვილი რეგიონში ისევ არ გამოჩენილა. “პირველებს” წყარო უყვება, რომ მმართველმა ძალამ ვიცე-გუბერნატორს თანამდებობის დატოვებს ურჩია, თუმცა შინჯიკაშვილს გადადგომის შესახებ ოფიციალური განცხადება ამ დრომდე არ გაუკეთებია.
წყარო “შაბათის ეთერს” უყვება, რომ განსაკუთრებულ დავალებათა დეპარტამენტის უფროსთან, ზვიად ხარაზიშვილთან დაპირისპირების შემდეგ, “ქართული ოცნების” ჩინოვნიკი ქვეყნიდან მის საძმოსთან ერთად გაიქცა.
- ხარებას სპეცრაზმელებთან დაპირისპირებიდან მალევე გიორგი შინჯიკაშვილთან ერთად ქვეყანა გიორგი უბილავამ, ჯაბა იოსელიანთან და დიმიტრი ჭუმბურიძესთან ერთად დატოვა.
ამ ადამიანების სახელმა რუსული კანონის წინააღმდეგ ქუჩაში გამოსული აქტივისტების ცემის საქმეში არაერთხელ გაიჟღერა.
ფოტოები, რომელზეც შინჯიკაშვილი და მისი გარემოცვაა აღბეჭდილი, სავარაუდოდ გერმანიაშია გადაღებული. კიდევ ერთ ფოტოზე შინჯიკაშვილი და დიმიტრი ჭუმბურიძე დროებით საცხოვრებელთან პოზირებენ.
სპეციალური დანიშნულების რაზმის ხელმძღვანელს, ზვიად ხარაზიშვილს, იგივე ხარებასა და ქვემო ქართლის რწმუნებულის პირველ მოადგილეს, გიორგი შინჯიკაშვილს შორის დაპირისპირების დეტალები “შაბათის ეთერმა” 15 ივნისს გაავრცელა.
წყარო “ტვ პირველის” გამომძიებელ ჟურნალისტებს მაშინ უყვებოდა, რომ დაპირისპირება ხარებას სპეცრაზმელებსა და შინჯიკაშვილის მფარველობის ქვეშ მყოფ არაფორმალურ ძალადობრივ ჯგუფს შორის ერთ-ერთ რესტორანში მოხდა.
დაპირისპირებაში შინჯიკაშვილი პირადად ჩაერია, რის გამოც ხარებამ მასზე შურისძიება გადაწყვიტა.
“შაბათის ეთერმა” ექსკლუზიურად გადაიღო კადრები სოფელ მარტყოფში, შინჯიკაშვილის საცხოვრებელ სახლთან, სადაც რამდენიმე მანქანა და ათობით ადამიანი იყო მობილიზებული. სანამ შინჯიკაშვილი ქვეყნიდან გაიქცეოდა ისინი რამდენიმე დღე იცავდნენ ქვემო ქართლის ვიცე გუბერნატორის ოჯახს.
