„დინამოს“ სტადიონი, ჩვენი ქვეყნის მთავარი სტადიონი, არის ამორტიზებული,მდგრადობის პრობლემები შეიძლება შეიქმნას — ირაკლი კობახიძე

პრემიერი ამბობს, რომ ბორის პაიჭაძის სახელობის „დინამო არენა“ ამორტიზებულია. ამის შესახებ ირაკლი კობახიძემ ერთ-ერთ სამთავრობო არხზე ისაუბრა და აღნიშნა, რომ ამ მიმართულებით ახალი ინფრასტრუქტურის განვითარებაა საჭირო. 

„ახალი სტადიონის პროექტი გვაქვს დაანონსებული. „დინამოს“ სტადიონი, ჩვენი ქვეყნის მთავარი სტადიონი, არის ამორტიზებული, მდგრადობის პრობლემები შეიძლება შეიქმნას. აქედან გამომდინარე, გვჭირდება ამ მიმართულებით ახალი ინფრასტრუქტურის განვითარება“, – თქვა ირაკლი კობახიძემ.

ახალი სტადიონის პროექტზე პრემიერმა პირველად 22 აპრილს მთავრობის სხდომაზე ისაუბრა და  თქვა, რომ ბრიტანული სტილის სტადიონი ფეხბურთისა და რაგბისთვის იქნება განკუთვნილი. ამასთან, საქართველოს მთავრობამ ახალი სტადიონის აშენება ჩემპიონთა ლიგის ფინალის მასპინძლობისთვის განაცხადის შეტანას დაუკავშირა.

„იქნება გათვლილი 70 000 მაყურებელზე, რაც მოგვცემს საერთაშორისო უმნიშვნელოვანესი მატჩების მასპინძლობის საშუალებას. დღეს „დინამოს“ სტადიონზე ამის საშუალება ჩვენ არ გვაქვს. მაგალითისათვის, ჩვენ გვექნება ჩემპიონთა ლიგის ფინალის მასპინძლობის შესაძლებლობა. გარდა იმისა, რომ აშენდება ეს სტადიონი, ჩვენ უკვე აქედანვე დავიწყებთ განაცხადის შეტანას იმისათვის, რომ 2028 წელს თბილისმა, ახალმა სტადიონმა უმასპინძლოს ჩემპიონთა ლიგის ფინალს. რა თქმა უნდა, ძალიან მნიშვნელოვანია ქვეყნის წარმოჩენისთვის საერთაშორისო დონეზე“, – თქვა პარლამენტის ტრიბუნიდან ირაკლი კობახიძემ.

About The Author

NEWSTODAY.GE

See author's posts