რა გახდა დადიანის ქუჩაზე კორპუსის ნგრევის მიზეზი – რას ამბობენ ადგილობრივები
NEWSTODAY.GE
1 min read
დადიანის ქუჩის მცხოვრებლები, სადაც დღეს ერთ-ერთ კორპუსში იატაკი ჩაინგრა, მომხდარის სავარაუდო მიზეზებზე საუბრობენ. ამბობენ, რომ კორპუსს ისტორიული ძეგლის სტატუსი აქვს, ამორტიზირებული იყო, თუმცა მისი რესტავრაცია არ ხდებოდა.
ერთერთი ადგილობრივი ამბობს, რომ კორპუსს სახურავიც დაზიანებული აქვს, რის გამოც შენობაში წყალი ჩადის და უფრო მეტად აზიანებს.
40 წუთია, რაც ჩამოინგრა ეს შენობა, „ავერსში“ სავარაუდოდ რემონტი მიმდინარეობდა, ორი მუშა მოყვა. საბენდიერო გადარჩნენ, წეღან გადაიყვანეს სასწრაფოთი. ამორტიზირებული შენობაა, ისტორიულ ძეგლის სტატუსი აქვს, მისი რესტავრაცია უნდა მომხდარიყო, მაგრამ, რაც ჩვენ ქალაქში ხდება, ისტორიულ ძეგლებს ანგრევენ. სახურავი აქვს გადახდილი და წვიმა და წყალი შლის ამ შენობას და ფაქტობრივად, მოსახლეობა საფრთხეში იყო აქამდეც. ცხოვრობდნენ შიგნით, არასრულწლოვნებიც არიან. ახლა გამოიყვანეს მოსახლეობა და იმედია, დააბინავებენ მათ, – ამბობს ადგილობრივი.
კორპუსის კიდევ ერთი მცხოვრები ამბობს, რომ შენობის პირველ სართულზე, სადაც სარემონტო სამუშაოები მიმდინარეობდა, მუშებმა საყრდენი კედელი გამოიღეს, რასაც ნგრევა მოჰყვა.
თქვეს, რომ გამოიღეს საყრდენი კედელი. წუხელ საღამოს დაიწყო ნგრევა, ბზარები გაჩნდა და დღეს ჩამოინგრა მთლიანად სართულები, – ამბობს დადიანის ქუჩის მცხოვრები.
მომხდარს კიდევ ერთი ადგილობრივი იხსენებს.
შევდიოდით ბინაში. ჩემმა მეზობელმა იყვირა, რომ არ შეხვიდეთ, მემგონი, ინგრევა კედლებიო. შემდეგ პირველ სართულზე ჩამოვედით, ვნახეთ, რემონტი ტარდებოდა. გამოღებული იყო მთლიანად საძირკველი და კიდევ ჩაინგრა. ჩემი ნათესავი მოყვა ნანგრევში, მეზობელი მოყვა. მსუბუქი დაზიანებები აქვთ, – ამბობს ადგილობრივი.
თბილისში, დადიანის ქუჩაზე 3-სართულიან საცხოვრებელ კორპუსში იატაკი ჩამოინგრა. წინასწარი ინფორმაციით, დაშავებულია 3 ადამიანი, ორი ადგილობრივი და ერთი მუშა, რომელიც ამავე კორპუსში მდებარე აფთიაქში სარემონტო სამუშაოებს აწარმოებდა. დაშავებულები დაჟეჟილობებით კლინიკაში გადაიყვანეს.
About The Author
