ამერიკული გამოცემა AL.com-ის ინფორმაციით, შეერთებული შტატების რიგ შტატებში გავრცელებულია ინფლუენზის განსაკუთრებით მძიმე შტამი, რომელიც საზოგადოებაში „სუპერ გრიპის“ სახელით არის ცნობილი. მოქალაქეებს მოუწოდებენ, ყურადღება მიაქციონ ვირუსისთვის დამახასიათებელ სიმპტომებს და საჭიროების შემთხვევაში დროულად მიმართონ სამედიცინო დახმარებას.
ჯანდაცვის ექსპერტები აღნიშნავენ, რომ სეზონური გრიპისგან განსხვავებით, „სუპერ გრიპის“ მიმდინარეობა ხშირად უფრო მძიმეა და შესაძლოა გამოიწვიოს სერიოზული გართულებები, განსაკუთრებით რისკ-ჯგუფებში შემავალ პირებში, როგორებიც არიან მცირეწლოვანი ბავშვები, ხანდაზმულები და ქრონიკული დაავადებების მქონე ადამიანები. ვირუსისთვის დამახასიათებელი ნიშნებია მაღალი ტემპერატურა, შემცივნება, ხველა, ყელის ტკივილი, სურდო, თავისა და კუნთების ტკივილი, ასევე საერთო სისუსტე და დაღლილობა. სამედიცინო სპეციალისტები მოუწოდებენ საზოგადოებას, დაიცვან ჰიგიენის წესები, მოერიდონ ხალხმრავალ ადგილებს და გაუფრთხილდნენ საკუთარ ჯანმრთელობას.
ადრეული დიაგნოსტიკა და დროული მკურნალობა გადამწყვეტია ვირუსის გავრცელების შესაჩერებლად და პაციენტების მდგომარეობის გასაუმჯობესებლად. ექიმთან კონსულტაცია რეკომენდებულია სიმპტომების გამოვლენისთანავე, რათა თავიდან იქნას აცილებული შესაძლო გართულებები და უზრუნველყოფილი იყოს სწორი სამედიცინო მართვა. ჯანდაცვის უწყებები მოუწოდებენ მოსახლეობას, გაითვალისწინონ სპეციალისტების რჩევები და იმოქმედონ პასუხისმგებლობით.
