აშშ-ის ვაჭრობის ფედერალურმა კომისიამ (FTC) უარი თქვა სკოტ ცუკერმანის მოთხოვნაზე, გაეუქმებინათ მისთვის დაწესებული ბანი, რომელიც მას ჯაშუშური პროგრამების წარმოებას უკრძალავს. ცუკერმანი არის კომპანია Support King-ის და მისი შვილობილი კომპანიების SpyFone-ისა და OneClickMonitor-ის დამფუძნებელი.

ბანი 2021 წელს დაწესდა, მას შემდეგ, რაც ცუკერმანის კომპანიის მონაცემთა ბაზაში შეღწევის შედეგად, მომხმარებლებისა და მათ მიერ თვალთვალის ქვეშ მყოფი პირების პირადი ინფორმაცია გამჟღავნდა. ივლისში ცუკერმანმა კომისიას ბანის მოხსნის ან შეცვლის თხოვნით მიმართა, რომელიც FTC-იმ ორშაბათს ოფიციალურად უარყო.

2021 წელს FTC-იმ ცუკერმანს აუკრძალა „ნებისმიერი სათვალთვალო აპლიკაციის, სერვისის ან ბიზნესის შეთავაზება, პოპულარიზაცია, გაყიდვა ან რეკლამირება“, რაც ფაქტობრივად შეუძლებელს ხდის მისთვის ამ სფეროში საქმიანობის გაგრძელებას. ეს გადაწყვეტილება კიდევ ერთხელ უსვამს ხაზს FTC-ის მზადყოფნას, დაიცვას მომხმარებლები ჯაშუშური პროგრამებისგან.