საქართველოს ფინანსთა სამინისტროს საგამოძიებო სამსახურის თანამშრომლებმა, ორგანიზებული ჯგუფის მიერ ჩადენილი საბაჟო წესის დარღვევის ფაქტზე, ყაზახეთის სამი მოქალაქე დააკავეს. გამოძიება განსაკუთრებით დიდი ოდენობით ნავთობის საბაჟო საზღვარზე გვერდის ავლით და მისგან მალულად განკარგვის საქმეს ეხება, რომელიც ბათუმის პორტთან არის დაკავშირებული.
საგამოძიებო უწყების ინფორმაციით, დადგინდა, რომ შპს „ბათუმის ნავთობტერმინალი“-ს ხელმძღვანელმა პირებმა, საბაჟო პროცედურების გვერდის ავლით, ტერმინალის რეზერვუარებში არსებული 10 000 ტონაზე მეტი განუბაჟებელი ნედლი ნავთობი უკანონოდ გაასაღეს. ამ დანაშაულებრივი სქემის შედეგად, ნედლი ნავთობი საქართველოს საბაჟო საზღვარზე ისე გავიდა, რომ მისგან გადასახადები არ იქნა გადახდილი. აღნიშნული ნავთობის საბაზრო ღირებულება კი 15 მილიონ ლარს აღემატება.
დანაშაულებრივ საქმიანობაში სავარაუდოდ ჩართული იყო შპს „ბათუმის ნავთობტერმინალი“-ს ხელმძღვანელობა. თავად „ბათუმის ნავთობტერმინალი“ წარმოადგენს ყაზახეთის სახელმწიფო საკუთრებაში არსებული ნავთობისა და გაზის კომპანიის შვილობილ საწარმოს.
