„Indie Game Awards“-მა თამაშ „Clair Obscur: Expedition 33“-ს ორი მნიშვნელოვანი ჯილდო, მათ შორის „წლის თამაში“ და „სადებიუტო თამაში“, ჩამოართვა. ამ გადაწყვეტილების მიზეზი დეველოპერ Sandfall Interactive-ის მიერ პროექტის შექმნის პროცესში გენერაციული ხელოვნური ინტელექტის გამოყენება გახდა, რის შესახებაც ინფორმაცია Mashable-მა გაავრცელა.

დაჯილდოების ცერემონიალის წესები მკაფიოდ ადგენს, რომ ნებისმიერი თამაში, რომელიც დეველოპმენტის პროცესში გენერაციულ ხელოვნურ ინტელექტს იყენებს, „კატეგორიულად შეუფერებელია“ ნომინაციისთვის. Sandfall Interactive-მა დაადასტურა AI-ის გამოყენების ფაქტი და განმარტა, რომ ის მხოლოდ დროებითი ტექსტურებისთვის იყო გამიზნული, რომლებიც საბოლოო პროდუქტიდან უნდა ამოღებულიყო. თუმცა, ხარისხის კონტროლის მიუხედავად, ზოგიერთი ხელოვნური ინტელექტის მიერ გენერირებული მასალა მაინც მოხვდა საბოლოო თამაშში და შესაბამისად, საჯარო სივრცეშიც.