ამერიკულმა ავტომწარმოებელმა Ford-მა და ფრანგულმა Renault Group-მა ევროპის ბაზარზე კონკურენტუნარიანი ელექტრომობილების წარმოების შესახებ შეთანხმებას მიაღწიეს. კომპანიები 2028 წლიდან გეგმავენ ორი ხელმისაწვდომი ელექტრომობილის გამოშვებას Ford-ის ბრენდით.

თანამშრომლობის ფარგლებში, Ford უზრუნველყოფს დიზაინს, ხოლო Renault ავტომობილებს საკუთარ ქარხანაში, ჩრდილოეთ საფრანგეთში ააწყობს. ელექტრომობილები Renault-ის ტექნოლოგიურ პლატფორმაზე, Ampere-ზე შეიქმნება. Ford-ის აღმასრულებელმა დირექტორმა ჯიმ ფარლიმ აღნიშნა, რომ კომპანია ევროპაში კონკურენციის შესანარჩუნებლად იბრძვის, განსაკუთრებით ჩინური ავტომწარმოებლების ზეწოლის ფონზე.