ჯანმოს ვაქცინების უსაფრთხოების გლობალური საკონსულტაციო კომიტეტის ახალი ანალიზის თანახმად, არსებული მტკიცებულებების საფუძველზე, ვაქცინებსა და აუტიზმის სპექტრის აშლილობებს (ASD) შორის მიზეზობრივი კავშირი არ არსებობს. აღნიშნული დასკვნა კიდევ ერთხელ ადასტურებს ჯანმოს პოზიციას, რომ ბავშვთა ვაქცინები აუტიზმს არ იწვევს.
1999 წელს დაარსებული გლობალური საკონსულტაციო კომიტეტი აერთიანებს საერთაშორისო ექსპერტებს, რომლებიც ჯანმოს დამოუკიდებელ და ავტორიტეტულ სამეცნიერო რჩევებს აწვდიან ვაქცინების უსაფრთხოებასთან დაკავშირებულ პრიორიტეტულ საკითხებზე. 2025 წლის 27 ნოემბერს განხილული ანალიზი, პირველ რიგში, ფოკუსირებული იყო თიომერსალის შემცველ ვაქცინებსა და ASD-ს შორის კავშირზე, ასევე ზოგადად ვაქცინებსა და ASD-ს შორის ასოციაციაზე.
კვლევაში გამოყენებულია 31 პირველადი კვლევის მონაცემები, რომლებიც 2010 წლის იანვრიდან 2025 წლის აგვისტომდე პერიოდში გამოქვეყნდა. კომიტეტის განცხადებით, ვაქცინაციის მნიშვნელობა გაცილებით აღემატება რაიმე პოტენციურ რისკს.
