მოსკოვში, ელეცკაიას ქუჩაზე მომხდარ აფეთქებას სამი ადამიანი, მათ შორის ორი პოლიციელი ემსხვერპლა. რუსეთის საგამოძიებო კომიტეტის ინფორმაციით, ინციდენტი დღეს მოხდა, როდესაც საგზაო პოლიციის თანამშრომლები საეჭვო პირის შეჩერებას ცდილობდნენ, რა დროსაც ასაფეთქებელი მოწყობილობა ამოქმედდა.
საგამოძიებო კომიტეტის ცნობით, საგზაო პოლიციის ორმა ოფიცერმა, რომლებიც მორიგეობდნენ, პოლიციის მანქანასთან ახლოს „საეჭვო პირი“ შენიშნეს. მათ გადაწყვიტეს მიახლოებოდნენ საეჭვო პირს დასაკავებლად, რა მომენტშიც თვითნაკეთი ასაფეთქებელი მოწყობილობა აფეთქდა. შედეგად, ორივე პოლიციელი მიღებული მძიმე დაზიანებებისგან გარდაიცვალა. აფეთქების ეპიცენტრთან ახლოს მყოფი ერთი სამოქალაქო პირიც დაიღუპა.
აღსანიშნავია, რომ აღნიშნული აფეთქება იმ რაიონთან ახლოს მოხდა, სადაც მიმდინარე კვირის ორშაბათს, ავტომობილის აფეთქების შედეგად, რუსი გენერალი, ლეიტენანტი ფანილ სარვაროვი დაიღუპა. ამჟამად ადგილზე სამართალდამცავი ორგანოების წარმომადგენლები მუშაობენ და საგამოძიებო მოქმედებები მიმდინარეობს ყველა დეტალის დასადგენად.
