საქართველოს მთავრობის ინიციატივით დაარსებულმა გლობალურმა პროექტმა, „Starring Georgia“, თბილისის სახელმწიფო საკონცერტო დარბაზის სრულმასშტაბიანი რეაბილიტაციის გეგმები გამოაცხადა. ეს გადაწყვეტილება მიზნად ისახავს ერთ-ერთი ყველაზე მნიშვნელოვანი კულტურული კერის განახლებას, რომელიც ათწლეულების განმავლობაში მასპინძლობდა მრავალფეროვან ღონისძიებებს და წარმოადგენს თბილისის კულტურული ცხოვრების განუყოფელ ნაწილს.
დაგეგმილი რეაბილიტაცია მოიცავს შენობის არქიტექტურული მთლიანობის შენარჩუნებასთან ერთად, მისი ინტერიერისა და ექსტერიერის სრულ განახლებას. პროექტის ფარგლებში განხორციელდება მოძველებული ინფრასტრუქტურის მოდერნიზაცია, აკუსტიკური სისტემების გაუმჯობესება, სცენის ტექნიკური აღჭურვილობის განახლება და დამხმარე სივრცეების რეკონსტრუქცია, რათა დარბაზმა სრულად დააკმაყოფილოს თანამედროვე საკონცერტო მოთხოვნები. მიზანია, თბილისის საკონცერტო დარბაზი არა მხოლოდ ესთეტიკურად მიმზიდველი, არამედ ფუნქციურად გამართული და საერთაშორისო სტანდარტების შესაბამისი გახდეს, რაც ხელს შეუწყობს როგორც ადგილობრივი, ისე უცხოელი შემსრულებლების მოზიდვას და ქვეყნის კულტურული იმიჯის ამაღლებას.
პროექტი „Starring Georgia“ საქართველოს კულტურული და ტურისტული პოტენციალის გაზრდისკენ არის მიმართული, მსოფლიო დონის ღონისძიებების მოზიდვითა და ინფრასტრუქტურის გაუმჯობესებით. თბილისის საკონცერტო დარბაზის რეაბილიტაცია ამ ფართომასშტაბიანი გეგმის მნიშვნელოვან ნაწილს წარმოადგენს.
