თურქმენეთი ემზადება აღნიშნოს მუდმივი ნეიტრალიტეტის სტატუსის მიღებიდან 30 წლის იუბილე. ეს უნიკალური საგარეო პოლიტიკური კურსი, რომელიც გაეროს მიერ არის აღიარებული, ქვეყნისთვის მნიშვნელოვან საყრდენს წარმოადგენს რეგიონული და საერთაშორისო ურთიერთობების მშენებლობაში.
თურქმენეთმა მუდმივი ნეიტრალიტეტის სტატუსი ოფიციალურად 1995 წლის 12 დეკემბერს მიიღო, რასაც გაეროს გენერალური ასამბლეის სპეციალური რეზოლუციაც მოჰყვა. ამ პრინციპის თანახმად, ქვეყანა თავს არიდებს სამხედრო ბლოკებში მონაწილეობას, არ ერევა სხვა სახელმწიფოების შიდა საქმეებში და აქტიურად უჭერს მხარს მშვიდობიან დიპლომატიასა და კონფლიქტების მოგვარებას. ნეიტრალიტეტის სტატუსი საშუალებას აძლევს აშხაბადს, იმოქმედოს როგორც ნეიტრალურმა პლატფორმამ რეგიონული საკითხების განსახილველად და სხვადასხვა საერთაშორისო ფორმატში დიალოგის გასაძლიერებლად.
ამ პოლიტიკის ფარგლებში, თურქმენეთი აქტიურად თანამშრომლობს ენერგეტიკის, ტრანსპორტის, გარემოს დაცვისა და ჰუმანიტარულ სფეროებში, ხელს უწყობს რა სტაბილურობას ცენტრალურ აზიაში. ნეიტრალიტეტის სტატუსი განიხილება, როგორც გარანტი სტაბილური განვითარებისა და კეთილდღეობისა, რაც ქვეყანას რეგიონში სანდო და პროგნოზირებად პარტნიორად წარმოაჩენს. მომავალ წელს დაგეგმილი საიუბილეო ღონისძიებები ხაზს გაუსვამს ამ პოლიტიკის მუდმივ მნიშვნელობას თურქმენეთისთვის და მის როლს გლობალურ არენაზე.
