ევროკომისიამ სოციალურ ქსელ X-ს 120 მილიონი ევროს ჯარიმა დააკისრა ევროკავშირის ციფრული სერვისების აქტის (DSA) დარღვევისთვის. ჯარიმის შემდეგ, X-მა ევროკომისიის სარეკლამო ანგარიში გააუქმა.

კომისიის განცხადებით, X-ის ლურჯი ნიშნის სისტემა (Blue Checkmark) არის „მოტყუებითი“ და მომხმარებლებს თაღლითობისა და პერსონიფიკაციის რისკის ქვეშ აყენებს. ასევე, კომისია აღნიშნავს, რომ X-ის სარეკლამო არქივი ვერ აკმაყოფილებს DSA-ის გამჭვირვალობისა და ხელმისაწვდომობის მოთხოვნებს. X-ს მიეცა 60 დღე ლურჯ ნიშნებთან დაკავშირებულ პრეტენზიებზე პასუხის გასაცემად და 90 დღე სარეკლამო გამჭვირვალობის დარღვევებთან დაკავშირებით, წინააღმდეგ შემთხვევაში, შესაძლოა, დამატებითი სანქციები დაეკისროს.

ჯარიმის გამოცხადების შემდეგ, X-ის მფლობელმა, ილონ მასკმა, აღნიშნა, რომ ეს არის „სისულელე“.