პარლამენტის თავმჯდომარე მოქალაქეებს 29 აპრილს რუსული კანონის მხარდამჭერ აქციაზე მისვლისკენ მოუწოდებს. შალვა პაპუაშვილის მტკიცებით, რუსთაველზე დგომა ახლა ქვეყნის ღირსების საკითხია და მნიშვნელოვანია, ყველამ დაინახოს, რა სურს რეალურად ქართველ ხალხს და საკადრისი პასუხი გაეცეს იმ ზიზღის კამპანიას, რომელსაც მისი თქმით, ენმ თავისი უცხოელი მფარევლების მეშვეობით აწარმოებს.
მნიშვნელოვანია, 29-ში რომ ყველა, დიდიც და პატარაც, ქალიც და კაციც, საჯარო მოხელეც და ბიზნესმენიც, ქუდზე კაცი უნდა გამოვიდეს რუსთაველზე, იმიტომ, რომ ამ ზიზღის კამპანიას, რომელსაც „ნაციონალური მოძრაობა“ აწარმოებს ქართველი ხალხის წინააღმდეგ თავისი უცხოელი მფარველების მეშვეობით, ამ ზიზღის კამპანიას ჩვენ ქართული ღირსებით და ღირებულებებით უნდა ვუთხრათ ქართველი ხალხის სიტყვა. მოწოდებაა, რომ ეს არის ეროვნული მნიშვნელობის საკითხი. როდესაც ჩვენ ვუპირისპირდებით შავ ფულს, რომელიც შემოდის უცხოეთიდან, როდესაც ჩვენ ვუპირისპირდებით ქართული ღირებულებების წინააღმდეგ მიმართულ პროპაგანდას, ეს არის ეროვნული და ღირსების საკითხი, რომ ყველა გამოვიდეს რუსთაველზე და დავანახოთ ყველას ქვეყნის შიგნითაც და გარეთაც, რა სურს ქართველ ხალხს. აქ დიდიც და პატარაც, ქალიც და კაციც, საჯარო მოხელეც, ბიზნესმენიც, ყველა უნდა იყოს რუსთაველზე, – ამბობს შალვა პაპუაშვილი.
რუსული კანონის მხარდამჭერ აქციაზე “ქართულ ოცნებას” ხალხი იძულებით მიჰყავს – სოციალურ ქსელში გავრცელებული მიმოწერებით დგინდება, რომ „ქართული ოცნების“ პირველი სამიზნე სოციალური დასაქმების პროგრამის ბენეფიციარები არიან.
ეს ის ხალხია, რომლებიც ერთი წლის წინ სასაფლაოს მომვლელად, მეეზოვედ, ან დამლაგებლად სახელმწიფო პროგრამის ფარგლებში დაასაქმეს.
მიმოწერებით ასევე ცხადი ხდება, რომ ყველას სთხოვენ, ორშაბათს უფასო ავტობუსებში ჩასხდნენ და თბილისში ჩამოვიდნენ.