ნაკრაში დაკარგული მესამე მოზარდის ცხედარიც იპოვეს

სვანეთში, მესამე დაკარგული მოზარდის საბა გვარმიანის ცხედარი იპოვეს. მაშველებმა მე-12 კლასის მოსწავლის ცხედარს მდინარე ენგურში მიაგნეს – ამ წუთებში ისინი მის ამოყვანას ცდილობენ.

მანამდე, გამთენიისას 14 წლის გიორგი ვიბლიანის ცხედარი ნაკრაში მდებარე პატარა ჰესთან აღმოაჩინეს. აღდგომის დღეს კი, საკუთარმა ბიძამ იპოვა მე-12 კლასელი ეკა ვიბლიანის ცხედარი შემთხვევის ადგილთან ახლოს. 

მეექვსე დღეა მაშველები და ადგილობრივები უწყვეტად მუშაობენ სოფელ ნაკრაში, მდინარე ნაკრასა და მის ხეობაში, ასევე ათვალიერებენ მდინარე ენგურსაც.

შემთხვევა 2 მაისს, ხუთშაბათს, საღამოს საათებში მაშინ მოხდა, როდესაც “პაჯეროს” მარკის ავტომობილით სამი არასრულწლოვანი ჭუბერიდან, ადგილობრივი მაისობის დღესასწაულიდან ბრუნდებოდა. ამინდის ცვლილების გამო, სავარაუდოდ, ავტომობილი მოცურდა, ხევში გადაიჩეხა და მდინარე ნაკრაში ჩავარდა.