
დროას ლიდერის, ელენე ხოშტარიას თქმით, გააკეთებს ყველაფერს, რომ ახალის, დროას და გირჩი-მეტი თავისუფლების პლატფორმის ნაწილი ლელოც იყოს. მან TV პირველის ეთერში აღნიშნა, რომ თუ ეს არ გამოვა, ისურვებდა, ლელომ ცალკე შექმნას პოლიტიკური ცენტრი.
“მე შემიძლია, დავდო საჯარო პირობა და ამას ყველა ნახავს მოქმედებებში, მე პირადად გავაკეთებ ყველაფერს, რომ შესაძლებელი იყოს, ლელო კვლავ ამ პლატფორმის ნაწილი იყოს, ჩემი მხრიდან რა კომპრომისიც, რა მოქნილობაც იქნება აუცილებელი, მე გავაგრძელებ და ეს იყო ყველა მოლაპარაკებაში ჩემი მიდგომა.
ეს თუ არ გამოვა, ვისურვებდი, ლელომ ასევე შექმნას გარკვეული ცენტრი. ჩემი ამოცანაა, ნაციონალური მოძრაობა იყოს ისეთ ფორმაში, რომელიც თავის ამომრჩეველს სრულად დააკმაყოფილებს, ჩვენ, უკვე არსებული ცენტრი, ვიყოთ საუკეთესო ფორმაში და ან ლელო იყოს ჩვენი ნაწილი ან ჩამოაყალიბოს საკუთარი ცენტრი” – თქვა ხოშტარიამ.
TV პირველის კითხვაზე, რა იყო ახალი პლატფორმისა და ლელოს უთანხმოების მიზეზი და იყო თუ არა ეს მართლაც ნიკა გილაურის საკითხი, ან მოლაპარაკებებისას განიხილეს თუ არა პრემიერმინისტრობის კანდიდატიც, ელენე ხოშტარია პასუხობს, რომ შიდა დისკუსიებზე საუბარი “კატეგორიულად არაეთიკურად” მიაჩნია.
“შიდა მოლაპარაკებები არის შიდა მოლაპარაკებები იმიტომ, რომ… რომ შეგვეძლოს იმაზე ლაპარაკი, რა განიხილებოდა, მაშინ ღია კარში უნდა ტარდებოდეს, რომ მთელი პროცესი ნახოს ყველამ… კატეგორიულად არაეთიკურად მიმაჩნია, ნებისმიერი საკითხზე, განხილულია თუ არაა განხილული, ეს იყო მიზეზი თუ არ იყო, ამაზე საერთოდ რამე კომენტარის გაკეთება.
პრემიერმინისტრობის საკითხი არის განსაზღვრული ქარტიით, ქარტია არის ჩემი სახელმძღვანელო, ზურაბიშვილის მონაწილეობის გარეშე არანაირი გადაწყვეტილება, არანაირი ჩამოყალიბება არ იქნება, რადგან ამას მოვაწერე ხელი და ეს იქნება აუცილებლად ასე. ასევე, პრემიერობის განდიდატი უნდა შეთანხმდეს ყველა ოპოზიციურ პარტიასთან” – თქვა ხოშტარიამ.
9 ივლისს ახალი და დროა-გირჩი მეტი თავისუფლება საარჩევნოდ გაერთიანდნენ. რაც შეეხება ლელოს, რომელიც ახალის და დროა-გირჩი მეტი თავისუფლების პლატფორმის ნაწილად მოიაზრებოდა, ნიკა გვარამიამ აღნიშნა, რომ “მცირე განსხვავებების” გამო, “ამ წუთში” შეთანხმება ვერ მოხერხდა.